𝗔𝗺𝗯𝗼𝗵𝗶𝗱𝗮𝗵𝘆, 𝗔𝗹𝗮𝘁𝘀𝗶𝗻𝗮𝗶𝗻𝘆 𝟮𝟴 𝗺𝗮𝗿𝘁𝘀𝗮 𝟮𝟬𝟮𝟮 – Manao tohivakana ny fanaovana ny asa ho fanatanterahana ny velirano fahadimy nataon’ny Filoham-pirenena Andry RAJOELINA izay miompana indrindra amin’ny fanomezana fahasalamana ny vahoaka tsy ankanavaka.
Vaovao nisongadina tamin’ny herinandro lasa teo ny fanamafisana ny rafi-pahasalamana eto Madagasikara. Voakasika manokana amin’izany ny fanatsarana ny famatsiana fanafody, indrindra any amin’ireo toerana lavitra sy saro-dàlana. Araka izany, tontosa tany Antetezambaro, distrikan’ny Toamasina II ao amin’ny Faritra Atsinanana ny fanombohana ofisialy ny fitaterana fanafody amin’ny alalan’ny « drône » izay fiaraha-miasan’ny Fitondram-panjakana 
sy ny Mpiara-miombon’antoka USAID/IMPACT. Teo ihany koa ny fanatanterahana ny fankalazana ny andro manerantany ho fampahafantarana ny “trisomie 21” izay notanterahina ny alatsinainy 21 martsa lasa teo sy ny fitsaboana manatona vahoaka, nandraisana an-tanana maimaimpoana ny fizaham-pahasalamana sy ny fitsaboana ireo mpianatra eo anivon’ny EPP Manarapenitra Anosiala, ary ireo mpitsabo avy ao amin’ny Hopitaly be Anosiala 
no nifanome tànana tamin’izany.
Mikasika ny ady amin’ny tazomoka dia notontosaina tamin’iny herinandro lasa iny Tany Mananjary sy Vohipeno ny famindram-pitantanana ny tetikasa TIPTOP avy amin’ny Mpiara-miombon’antoka JHPIEGO ho an’ny Ministeran’ny Fahasalamam-bahoaka. Raha mikasika ity herinandro vaovao ity indray no hojerena dia mitohy ny fanentanana ho amin’ny fanaovam-baksiny fanefitry ny covid-19 ho an’ny faritra rehetra manerana ny Nosy. Nanamafy izany ny Tale Jeneraly misahana ny Fisorohana ara-pahasalamana, izay nisolo tena an’Andriamatoa Ministra, ary nanentana ny rehetra hampahatsiahy sy hitaona ny manodidina hiroso amin’izany fanaovam-baksiny izany. Mikasika ny fampitaovana sy ny fanamafisana ny rafi-pahasalamana dia hotanterahina any Antsiranana ny Alakamisy 31 martsa 2022 ho avy izao ny fanolorana fitaovana sy kojakoka medikaly ireo Tobimpahasalamana ao amin’ny Faritra DIANA sy SAVA izay iarahana amin’ny Mpiara-miombon’antoka USAID ACCESS.
Ankoatra ny fitsaboana, manana adidy hafa ho an’ny Tanindrazana ny Ministeran’ny Fahasalamam-bahoaka. Hisy ny fambolen-kazo iraisana izay ho tanterahana any Manakavaly ny Alakamisy 31 martsa 2022. Mirary herinandro finaritra ho antsika rehetra ny Ministeran’ny Fahasalamam-bahoaka.
: SCM/DIRCOM-MSANP
