𝗙𝗜𝗛𝗔𝗢𝗡𝗔𝗡’ 𝗡𝗬 𝗠𝗣𝗜𝗞𝗔𝗠𝗕𝗔𝗡𝗔 𝗔𝗢 𝗔𝗠𝗜𝗡’𝗡𝗬 𝗚𝗢𝗩𝗘𝗥𝗡𝗘𝗠𝗔𝗡𝗧𝗔 𝗦𝗬 𝗡𝗬 𝗔𝗡𝗧𝗘𝗡𝗜𝗠𝗜𝗘𝗥𝗔𝗠-𝗣𝗜𝗥𝗘𝗡𝗘𝗡𝗔

CCI Ivato, 02-03 desambra 2021

Niisa 29 ireo fanontaniana ho an’ny Ministeran’ny Fahasalamam-bahoaka.

Nitondra ny valiny mikasika izany Andriamatoa Minisitry ny Fahasalamam-bahoaka, Prof. RANDRIAMANANTANY Zely Arivelo izay nosokajiana toy izao.

MIKASIKA NY FOTO-DRAFITR’ASA EFA TONTA

Misy ny tetibola manokana (budget) ho an’ny fanatsarana (rehabilitation) sy fampitaovana ireo foto-drafitr’asa ireo.

MIKASIKA NY FOTO-DRAFITR’ASA VAOVAO

Hopitaly manarapenitra 14 sy CSB II Manarapenitra aman-jatony no efa an-dala-pamaranana ny fanorenana azy amin’izao fotoana izao.

FANDRAISANA HO MPIASAN’NY FAHASALAMANA

Araka ny fampanantenana izay nataon’Andriamatoa Filohan’ny Repoblika ANDRY RAJOELINA dia eo andalam-panatanterahana ny fandraisana ho mpiasam-panjakana ireo « bénévole » ny Ministeran’ny Fahasalamam-bahoaka ankehitriny. Tsy misy atao latsaka ny distrika 114 izay nandray anjara tamin’izany.

Efa nisy ihany koa ny fandraisana Dokotera mpitsabo ankapobeny tamin’ny alalan’ny Tetikasa FAFY, ny fandraisana Farmasiana, Dokotera mpitsabo nify ary Teknisianina misahana ny Laboratoara.

FANAMAFISANA NY RAFI-PAHASALAMANA

Miroso amin’ny fanjakana tsara tantana ny Ministeran’ny Fahasalamam-bahoaka ary manentana ny fiadidiam-paritra ny Fahasalamana isan’ ambaratongany hameno araka ny tokony ho izy ny Boky mirakitra ny fananam-panjakana izay antoka iray ahafahana mandefa ireo Fitaovana araka ny filàna (Kidoro, farafara…)

Fanampin’izay, « Tensiomètre » sy « stéthoscope » aman’arivony maro no notsinjaraina eny anivon’ireo Tobimpahasalamana ho ampiasain’ny Mpiasan’ny fahasalamana, hanatsarana ny tolotra sy hamahana ireo olana teo aloha mikasika izany.

Mikasika ny resaka « Scanner » dia hidina ifotony hijery ny olana sy ny vahaolana mifandraika amin’izany ireo Tompon’ andraikitra eto amin’ny Ministeran’ny Fahasalamam-bahoaka amin’ity volana desambra 2021 ity.

FANOVAM-BAKSINY IADINA AMIN’NY COVID-19

– Tsy mikely soroka ny mpiasan’ny fahasalamana manatanteraka ireo paik’ady entina hanaovam-baksiny ny vahoaka Malagasy. Anisan’izany ny fanatonana isan-tokantrano sy ny fitetezana orinasa samihafa.

– Mihoatra ny 1 700 000 ny vaksiny izay misy eto Madagasikara amin’izao fotoana izao. Hatramin’ny faha 2 desambra 2021 teo dia 521.526 ny isan’ny olona nahavita tanteraka vaksiny iadiana amin’ny covid-19 ary atao izay hanatrarana ho 1.000.000 olona vita vaksiny hatramin’ny faran’ny taona. Mety ho tratra tsara izany satria herinandro lasa izay dia 400.000 sisa, ary nahavita 120.000 mahery ny Mpiasan’ny Fahasalamana tao anatin’ny herinandro, ary isaorana azy ireo izany ezaka lehibe ataony izany.

FITSABOANA NENTIM-PAHARAZANA

Voarara ny fanaovana dokambarotra, tsy ho an’ny fitsaboana nentim-paharazana ihany fa ho an’ny asa fitsaboana mihitsy. Misy ny « arrêté interministériel » izay mandrara izany ary fanampin’izay dia efa mamaraparana ny « décret interministériel » ny Fitondram-panjakana ankehitriny izay natao hanakanana ireo endrika fisolokiana amin’ny sehatry ny asa fitsaboana.

ADY AMIN’NY ARETINA MIFINDRA

– VIH/SIDA : Nohatsaraina ny paik’ady iadiana amin’ny aretina ary namafisina ny fanentanana sy ny fitiliana maimaimpoana mba ahafahana mahita ireo rehetra mitondra ny tsimokaretina ary omen’ny Fanjakana maimaimpona ny fanafody.

– HAROMOTANA: 31 no isan’ireo ivontoerana ahafahana misitraka ny vaksiny miaro amin’ny haromotana eto Madagasikara ary efa mijery ny fomba hampiakarana ny isan’ireo ivo-toerana ireo ny Ministeran’ny Fahasalamam-bahoaka ankehitriny.

Misokatra mandrakariva amin’ny fiaraha-miasa ny Ministeran’ny Fahasalamam-bahoaka, ary mandray ireo rehetra izay maniry ny hihaona aminy Andriamatoa Minisitra, « Mitady vahaolana isika, arak’ izay haingana indrindra, ahafahantsika manatratra ny tanjona araka ny VELIRANO FAHADIMIN’ Andriamatoa Filohan’ny Repoblika Andry RAJOELINA dia ny hoe « fahasalamana ho an’ny rehetra tsy anavahana sokajin-taona ».

: SCM/DIRCOM-MSANP