𝐅𝐀𝐍𝐈𝐓𝐀𝐑𝐀𝐍𝐀 𝐍𝐘 «𝐒𝐄𝐑𝐕𝐈𝐂𝐄 𝐃𝐄𝐒 𝐔𝐑𝐆𝐄𝐍𝐂𝐄𝐒 𝐂𝐇𝐔𝐉𝐑𝐀 𝐀𝐌𝐏𝐄𝐅𝐈𝐋𝐎𝐇𝐀»

« Zo-ny vahoaka ny hisitraka fahasalamana ara-kalitao ary izay no isan’ny antony nanaovana izao ezaka izao mba hanarapenitra ny tolotra ara-pahasalamana omena azy ireo… manentana antsika mpiasan’ny fahasalamana rehetra ary isika Vahoaka hahay hanaja ny foto-drafitr’asa satria na tsara tahaka ny inona aza izy ireny dia rehefa tsy mahay manaja isika dia vetivety dia simba…».

Anisan’ny nambaran’ Andriamatoa Minisitra, Prof. RANDRIAMANANTANY Zely Arivelo ireo nandritra ny fitsidihany ny fandrosoan’ny asa fanitarana ny « services des urgences/ATU » etsy amin’ny CHUJRA Ampefiloha ny tolakandron’ny Alakamisy faha 16 septambra 2021 lasa teo.

Santionany ihany izao hitantsika eto Antananarivo izao, fa isaky ny distrika amin’izao fotoana izao dia misy ihany koa ny fananganana CSB Manarapenitra, ary efa mandroso dia mandroso tokoa ny asa mikasika azy ireny.

Mitohy hatrany araka izany ny fanatanterahana ny velirano fahadimy nataon’ny Filohan’ny Repoblika tamin’ny Vahoaka Malagasy dia ny hanolorana fahasalamana ho an’ny rehetra tsy anavahana sokajin-taona. Tsy mikely soroka amin’izany ny Ministeran’ny Fahasalamam-bahoaka ary vavolombelon’izany izao fanitàrana sy fampanarahana ny fenitra ny « ATU – CHUJRA » izao.