𝐅𝐀𝐍𝐀𝐓𝐒𝐀𝐑𝐀𝐍𝐀 𝐍𝐘 𝐓𝐎𝐋𝐎𝐓𝐑𝐀 𝐀𝐑𝐀-𝐏𝐀𝐇𝐀𝐒𝐀𝐋𝐀𝐌𝐀𝐍𝐀 : 𝐅𝐢𝐭𝐬𝐢𝐝𝐢𝐡𝐚𝐧𝐚 𝐧𝐲 𝐂𝐇𝐑𝐑 𝐅𝐞𝐧𝐨𝐚𝐫𝐢𝐯𝐨 𝐀𝐭𝐬𝐢𝐧𝐚𝐧𝐚𝐧𝐚, 𝐅𝐚𝐫𝐢𝐭𝐫𝐚 𝐀𝐧𝐚𝐥𝐚𝐧𝐣𝐢𝐫𝐨𝐟𝐨

Mitohy hatrany ny ezaka efa natomboka amin’ny fanatsaràna ny kalitaon’ny tolotra ara-pahasalamana omena ny vahoaka sy ny tontolo iasan’ny mpiasan’ny fahasalamana.

Izany dia tafiditra ao anatin’ny fanatanterahana ny politika ankaboben’ny Fanjakana mikasika ny fahasalamam-bahoaka sy ny velirano fahadimin’ Andriamatoa Filohan’ny Repoblika, Andry RAJOELINA.

Ny Talata 14 septambra 2021 lasa teo dia nitsidika ny CHRR Fenoarivo Atsinanana ao amin’ny Faritra Analanjirofo, andriamatoa Tale Jeneralin’ny Famatsiana ara-pahasalamana (DGFS), Dr RAZAFIMAHATRATRA Rado. Nisy ny fihaonana nihainoana ny hetahetan’ireo mpiasan’ny fahasalamana any an-toerana sy nizaràna ny laharaham-pahamehan’ny Ministeran’ny fahasalamam-bahoaka ankehitriny.

Anisan’izany ny ady amin’ny kolikoly, ny fanatsaràna ny tolotra ara-pahasalamana amin’ny alalan’ny famatsiana fitaovana, ny fampiharana ny fitsaboana manaja ny mahaolona satria tsy vidiam-bola ny tsiky sy ny haja atolotra ireo tonga misitraka ny tolotra eny anivon’ny Tobimpahasalamana. Tetsy andanin’ izay, nampianarina ihany koa ny marary hanaja ireo lamina napetraka eny anivon’ny Toeram-pitsaboana.

Fantatra nandritra izao fitsidihana izao fa vitsy ny efitra fandraisana marary; tsy ampy ny isan’ny mpitsabo mpandidy ao amin’ny CHRR Fenoarivo Atsinanana ary nampanantena ny Ministera tomponandraikitra fa hijery vahaolana haingana.

Tsara ny manamarika fa ity Hopitalim-paritra ity dia anisan’ ireo manana fitaovana raitra raha tsy hilaza afa-tsy ny « Radiographie numérique, GeneXpert, Electroencephalogramme », ary anisan’ny mampiavaka azy ihany koa ny fananany « espace vert » sy toerana fialofana ho an’ireo mpanaraka marary.